Россия элчиси Британияга таҳдид қилди

Бу ҳақда "РИА Новости" хабар берди.

Агентликга кўра, Россиянинг Буюк Британиядаги элчиси Андрей Келин, агар британ ҳарбийлари мамлакат ҳудудий сувлари, жумладан, Ла-Манш бўғози орқали ўтаётган Россиянинг "соя флотидаги" танкерларини тўхтатишса, Москва тегишли жавоб чораларини кўришини маълум қилди.

"Бундай қарор жавобсиз қолмайди. Тегишли чоралар ишлаб чиқилмоқда. Бу британлар учун кутилмаган совға бўлсин", — деди Келин "РИА Новости" агентлигига берган интервьюсида.

25 март куни Британия ҳукумати ҳарбий-денгиз кучларига санкцияларни четлаб ўтиб Россия нефтини ташиётган кемаларни мамлакат ҳудудий сувларида тўхтатиш ваколатини берган эди. Бундан кўзланган асосий мақсад — кема эгаларини Британия оролларини шимолий йўналиш орқали айланиб ўтишга мажбур қилиш ва шу орқали уларнинг харажатларини оширишдир.

Шунингдек, Келин "қўлга олинган" кемалар ва юкларнинг эгалари судга мурожаат қилишини ва бу Британия ҳукумати учун қўшимча молиявий йўқотишларга олиб келишини таъкидлади.