Қозоғистон ҳудудий мудофаага тайёрланмоқда

Қозоғистон Сенати “Қозоғистон Республикасининг ҳудудий мудофааси тўғрисида”ги қонунни ва тегишли ўзгартиришларни маъқуллади.

Сенатор Галиасқар Сарибоевнинг айтишича, қонуннинг мақсади самарали ҳудудий мудофаа тизимини яратиш, сафарбарлик шайлигини ошириш ва фавқулодда вазиятларда аҳоли хавфсизлигини таъминлашдан иборат.

Қонунда ҳудудий мудофаа мудофаа тизимининг мустақил йўналиши сифатида белгиланган. Унда мақсад, вазифалар, тамойиллар ва амалга ошириш чора-тадбирлари белгилаб берилган. Ҳужжатда алоҳида молиялаштириш, шунингдек, ҳудудий ҳарбий органлар ва бўлинмалар фаолиятини тартибга солувчи норматив ҳужжатлар назарда тутилган.

Ҳужжатга янги атамалар киритилган: “кўнгилли” ва “ўзини-ўзи ҳимоя қилиш”. Президентнинг, унга бўйсунувчи органларнинг, ҳукуматнинг, Мудофаа вазирлигининг, Бош штабнинг, марказий ва маҳаллий ижро этувчи ҳокимият органларининг ваколатлари белгиланган. Юридик ва жисмоний шахсларнинг ҳуқуқ ва мажбуриятлари қайд этилади.

Қонунга кўра, мудофаа тизими ҳудудий қўшинлар, хавфсизлик кучлари, махсус кучлар ва кўнгиллилардан иборат бўлади. Кўнгилли бўлинмалар Қуролли Кучлар таркибида жанговар вазифаларни бажариши мумкин бўлади.

Мудофаа вазири ўринбосари Султон Камалетдиновнинг айтишича, қонун ўзгарувчан геосиёсий вазиятни ҳисобга олган ҳолда қабул қилинмоқда. Унинг сўзларига кўра, барча таҳдидларни олдиндан айтиб бўлмайди ва ҳамма нарсани олдиндан ҳимоя қилиб бўлмайди.