Қон тўкишдан завқланадиган шахс яна вазир этиб тайинланди

Таниқли ўта миллатчи Итамар Бен-Гвир миллий хавфсизлик вазири лавозимига қайта тайинланди.

Бен-Гвир январь ойида ўт очишни тўхтатиш келишувига норозилик билдирган ҳолда Исроил ҳукуматидан истеъфога чиқди ва Ғазо секторида жанглар қайта бошланганидагина Нетаняху коалициясига қайтишини кўриб чиқишини айтган эди.

У ўт очишни тўхтатишни ҲАМАС учун "мукофот" деб атаган эди. У бу келишув доирасида исроиллик асирларнинг озод этилишини ҳисобга олмаган ҳолда гапирди.

Исроил бош прокурори Нетаняхуга Бен-Гвирни аввалги лавозимидаги хатти-ҳаракатлари ва аниқ қонунбузарликлари туфайли мамлакат миллий хавфсизлик вазири этиб тайинламасликни маслаҳат берганига қарамай, у бу лавозимга қайта тайинланди.