Қирғизистоннинг Ўзбекистондаги собиқ элчисини қизи коррупцияда гумонланиб қўлга олинди

Маҳаллий оммавий ахборот воситаларининг хабар беришича, собиқ элчи Эмилбек Узоқбоевнинг қизи Меерим Узоқбоева давлат мулкини хусусийлаштиришдаги коррупцияда гумонланиб қўлга олинган. Гап Бишкекдаги “Қирғизайилкомок” корхонаси ҳақида кетмоқда. Айни пайтда ушбу компания акцияларининг 63 фоизи Узоқбоевлар оиласига тегишли. 1993 йилда оммавий хусусийлаштириш тўлқинида Эмилбек Узоқбоев корхонанинг бошланғич 0,5 фоиз акцияларини сотиб олган. Кейинги 30 йил давомида у аста-секин бошқа акциядорлардан улушларни харид қилган ва шу тариқа акцияларнинг 63 фоизини назорат қилган.

Адвокат Акинбек Ногоевнинг таъкидлашича, бу жараёнлар содир бўлган пайтда гумонланувчи Меерим Узоқбоева 10 ёшда эди. У қизни коррупцияда айблашга уринишни бемаънилик деб атади. Адвокатнинг қўшимча қилишича, Меерим ҳозир ҳам ушбу акцияларга эгалик қилмайди ва “Қирғизайилкомок” ОАЖ бош директори лавозимига 2017 йилдагина келган.

Адвокатнинг фикрича, бу иш ортида иккита асосий сабаб бўлиши мумкин. Бир томондан, корхона ҳудуди 10 гектардан зиёд бўлиб, бу ер уй-жой қуриш учун яроқли. Давлат шу сабабли ер участкасидан фойдаланмоқчи бўлиши мумкин ва ер манфаати туфайли иш қўзғатилган. Бошқа томондан, Мееримнинг отаси, Қирғизистоннинг Ўзбекистондаги собиқ элчиси ҳозирда “75 мактуб” бўйича ҳибсда қолмоқда.

Шу йилнинг феврал ойида 75 киши президент Садир Жапаров ва Жогорку Кенеш (парламент) раисига муддатидан олдин президентлик сайловларини ўтказишни сўраб мурожаат йўллаганди. Мурожаат муаллифлари кейинчалик қўлга олиниб, айримларига жиноий иш очилган. Мазкур мактуб ортидан Қирғизистон миллий хавфсизлик хизмати раиси, президент Садир Жапаровнинг яқин дўсти Қамчибек Ташиев лавозимидан озод этилганди. Жапаров ўзининг сўнгги интервюсида Ташиевнинг “75 мактуб”га алоқадорлигини тергов ва суд аниқлашини айтганди.