Сербия президенти Александр Вучич икки ярим йил ичида биринчи марта Россия президенти Владимир Путин билан телефон орқали мулоқот қилди.
Сербия етакчиси суҳбатни "яхши, очиқ, узоқ ва мазмунли" деб атади.
"Биз барча муҳим икки томонлама масалалар, шу жумладан иқтисодий масалалар бўйича фикр алмашиб олдик. Мен президент Путинга алоҳида миннатдорчилик билдирдим, чунки у "Газпром" раҳбари Алексей Миллер орқали Россиянинг бу қишда ҳам Сербия Республикасини етарли миқдорда газ билан таъминлашини кафолатлади," - дея таъкидлади Вучич ўзининг Инстаграмда эълон қилинган мурожаатида.
Вучич, шунингдек, томонлар ҳал қилинмаган барча масалаларни "яқин вақт ичида" муҳокама қилишини айтди. У Сербия Россияга қарши санкциялар жорий этишни режалаштирмаётганини таъкидлади ва Сербия томонининг БМТдаги саъй-ҳаракатларини қўллаб-қувватлагани учун миннатдорчилик билдирди.