Путин Трампнинг ултиматуми талабларини бажаришни режалаштирмаяпти

Reuters агентлигининг Кремлга яқин манбаларига таяниб хабар беришича, Путин Россиянинг ғалабасига ишонади ва Қўшма Штатларнинг янги санкциялари самарали бўлишига шубҳа билан қарамоқда. Россия Бош штаби Путинга Украина фронти икки-уч ой ичида қулаши мумкинлигини билдирган.

"Шу билан бирга, Россия президенти Трампни ғазаблантиришни хоҳламайди ва Вашингтон ва Ғарб билан муносабатларни яхшилаш имконини қўлдан бой бериши эҳтимолини тушунади. Аммо унинг учун ҳарбий мақсадлар, Украинадаги тўртта вилоятни (Донецк, Луганск, Херсон, Запороже) эгаллаш, бундан муҳимроқ", дейилади мақолада.

Reuters манбаларига кўра, Путин шахсий суҳбатларда АҚШ билан муносабатлар ёмонлашаётганидан хавотир билдирган, бироқ у ҳануз Москва Вашингтон билан “яна дўстлашиши” ва Ғарб билан савдо алоқаларини тиклаши мумкинлигига умидини йўқотмаган.

"Владимир Путин Доналд Трампнинг ғазабланаётганидан хавотирда, лекин урушни фақат АҚШ президенти хоҳлагани учун тугатишни истамайди. Кремл шунингдек, Трампнинг ултиматумни амалга оширишига ишонмайди, чунки у авваллар ҳам шундай таҳдид қилган, аммо ҳеч қандай амалий чоралар кўрмаган ёки қарорини ўзгартирган", дея қайд этади Reuters.

Бундан ташқари, Москва Хитой Россия нефтини сотиб олишни тўхтатишига ҳам ишонмаяпти. Истанбулда олиб борилаётган музокаралар эса реал мазмунга эга эмас, улар асосан гуманитар алмашинувлар муҳокамаси билан чекланмоқда.