Путин Россия иқтисодиёти «тикланганини» эълон қилди

Россия Президенти Владимир Путин санкциялардан сўнг Россия иқтисодиётининг тикланиши тугалланганини айтди. Унинг сўзлари Кремль сайтида келтирилган.

«Умуман олганда, Россия иқтисодиётининг тикланиш босқичи якунланди, деб айтишимиз мумкин», деди Путин.

Унинг сўзларига кўра, Россия «мисли кўрилмаган» «дўст бўлмаган мамлакатларнинг санкциялар ҳужумига» дош берди. Россия давлати раҳбари мамлакат ялпи ички маҳсулоти 2021 йилнинг санкциягача бўлган даражасига етганини таъкидлаб, янада барқарор ва узоқ муддатли ўсиш учун шароит яратишга чақирди.

Путиннинг эслатишича, апрель ойидаёқ бу йилги ялпи ички маҳсулот ўсиши 1,2 фоизни ташкил этиши кутилган эди. «Аммо, аслида, биз бу даражадан аллақачон ошиб кетдик ва йил охирига келиб ялпи ички маҳсулотнинг ўсиши 2,5, ҳатто, эҳтимол, 2,8 фоиздан кўпроқ даражага етиши мумкин», деди у. Президент бутун Россиядаги иқтисодий вазиятни «барқарор ва мувозанатли» деб таърифлади.