Путин ракеталарни синаш билан шуғулланиш ўрнига урушни тугатса яхши бўларди

Путин ракеталарни синаш билан шуғулланиш ўрнига урушни тугатса яхши бўларди — Доналд Трамп.

АҚШ президенти Доналд Трамп Россия президенти Владимир Путин бир кун аввал эълон қилган “Буревестник” ядровий двигателли қанотли ракетаси синовларига изоҳ берди.

"Москвадагилар Қўшма Штатларнинг “дунёдаги энг яхши” атом сувости кемаси Россия соҳиллари яқинида жойлашганини яхши билишади. Шу сабабли, АҚШга саккиз минг мил (12 минг километр) учадиган ракета керак эмас", — деди Оқ уй раҳбари.

"Улар биз билан ўйин ўйнамайди, биз ҳам улар билан ўйнамаймиз. Биз доим ракета синовларини ўтказамиз, лекин айтганимдек, бизда қудратли ядровий сувости кемаси бор. Путин ракета синови ҳақида айтган гапларини мен ўринли деб ҳисобламайман. У аллақачон тугаши керак бўлган, атиги бир ҳафта давом этиши керак бўлган, аммо тўрт йилдирки давом этаётган урушни якунлаши керак эди. Путин ана шу масала билан шуғулланиши керак, ракеталарни синаш билан эмас", — дея қўшимча қилди АҚШ президенти ўз самолётида журналистларга берган баёнотида.