Путин Ғарбни ресурслардан маҳрум қилишни таклиф қилмоқда

Россия президенти Владимир Путин ҳукуматга Ғарб санкцияларига жавобан уран, титан ва никель каби бир қатор муҳим товарлар экспортига чекловлар жорий этиш масаласини кўриб чиқишни топширди. Бу ҳақда «Интерфакс» хабар бермоқда.

Путин бош вазир Михаил Мишустиндан ушбу масалани ўрганишни сўраб, Россия бу ресурсларнинг катта ҳажмларини жаҳон бозорига етказиб беришини таъкидлади.

Путин қарор шошилинч чоралар кўришни талаб қилмаслигини таъкидлаб, нафақат рўйхатдаги товарларга, балки бошқаларга ҳам чекловлар қўйиш имкониятини кўриб чиқишни таклиф қилди.

“Биз бир қатор товарларни етказиб беришда чекланганмиз, лекин баъзи чекловлар ҳақида ҳам ўйлашимиз керак. Уран, титан, никель. Фақат ўзингизга зарар етказадиган ҳеч нарса қилманг, - деди президент.

Шунингдек, у Россияда табиий газ, олтин ва олмоснинг катта заҳираларига эга эканлигини эслатди.

Путиннинг баёнотидан кейин Лондон металл биржасида никель нархи 2,6 фоизга, Канаданинг NexGen Energy, Cameco ва Denison Mines каби уран қазиб олувчи компаниялари акциялари эса 5,2-5,4 фоизга ошди.