Путин Алиевга Россия ракеталари АZAL самолётини уриб туширмаганини, балки унинг ёнида портлаганини айтди — “Интерфакс”

Агентликнинг хабар беришича Россия президенти бу ҳақда Озарбойжон етакчиси билан Тожикистондаги учрашувида маълум қилган.

"Учрашув бошида Владимир Путин Илҳом Алиевга Ақтаудаги АZAL самолёти ҳалокатини муҳокама қилишни таклиф қилган. Россия раҳбарининг сўзларига кўра, самолёт ҳалокати, жумладан, осмонда Украина дрони бўлгани билан ҳам боғлиқ.

Путиннинг айтишича, Россия ҳаво ҳужумидан мудофаа тизими томонидан учирилган икки ракета АZAL самолётига тўғридан-тўғри тегмаган, балки ундан бир неча метр нарида портлаган.

Путин шунингдек, самолёт жанговар элементлар томонидан эмас, эҳтимол, уларнинг парчаларидан шикастланганини билдирган.

2024 йил 25 декабр куни АZAL авиакомпаниясига тегишли Embraer E190 самолёти Бокудан Грознийга учаётган пайтда Қозоғистоннинг Ақтау шаҳрида ҳалокатга учраган эди. Самолёт Украина дронлари Кавказ ҳудудларига ҳужум қилган пайтда зарбага учраган. Ҳалокат натижасида 38 киши ҳалок бўлган, 29 киши эса омон қолган.

Озарбойжон ҳукумати мазкур самолёт Россия ҳаво ҳужумидан мудофаа тизими ракетаси томонидан уриб туширилганини билдирган эди. АZAL самолёти ҳалокати ва Россиянинг ушбу воқеа учун жавобгарликни тан олмаслиги Москва ва Боку ўртасида дипломатик инқирозга олиб келганди.