"ПСЖ" Мессини "жазолади"

Клублар ўртасидаги жаҳон чемпионатининг 1/8 финалида "ПСЖ" ва "Интер Майами" жамоалари ўзаро баҳс олиб борди. Аргентиналик юлдуз Лионель Месси учун бу собиқ жамоага қарши фаолиятидаги илк учрашув бўлди. Месси ўзини кўрсатишга ҳаракат қилди, аммо классдаги фарқ жуда катта эди. "ПСЖ" 4:0 ҳисобида ғалаба қозонди, барча голлар танаффусга қадар урилди.

Шу тариқа собиқ жамоа Мессини "хиёнат" учун жазолади. "ПСЖ"дан кетганидан сўнг, Лионель Париждаги икки йил давомида ўзини бахтсиз ҳис қилганини бир неча бор айтганди.

Лионель Мессининг "Интер Майами" билан амалдаги шартномаси 2025 йил охиригача мўлжалланган. Бир неча кун аввал саккиз карра "Олтин тўп" соҳиби 38 ёшини нишонлаган эди.