Профессор Ҳасан Ҳасановнинг “Венгерлар ва озарбайжонларнинг умумий этник илдизлари” номли китоби тақдимоти бўлиб ўтди

2026 йил 10 июнь куни Туркий Маданият ва Мерос Жамғармаси бош қароргоҳида ташкилотнинг “Туркий дунё дипломатияси дурдоналари” китоблар туркуми доирасида нашр этилган янги асар — таниқли жамоат, давлат ва сиёсат арбоби, Туркий Давлатлар Ташкилоти Оқсоқоллар Кенгаши аъзоси, тарих фанлари доктори, профессор Ҳасан Ҳасановнинг “Венгерлар ва озарбайжонларнинг умумий этник илдизлари” номли китоби тақдимоти бўлиб ўтди.

Тадбирни кириш сўзи билан очган Жамғарма президенти Актоти Раимқулова меҳмонларни қутлар экан, Жамғарма туркий халқларнинг бой маданий меросини аъзо давлатлар ва халқаро майдонда кенг тарғиб этиб келаётганини таъкидлади. У ўз нутқида ташкилотнинг кузатувчи давлати бўлган Венгрия билан ҳамкорлик доирасида амалга оширилаётган лойиҳаларга алоҳида тўхталди. Хусусан, Жамғарма кўмагида Варшава Университетида Туркий маданият ва мерос марказининг очилиши ҳамда Жамғарма билан Ягеллон Университети ўртасида Ҳамкорлик меморандуми имзоланиши туркий маданий меросни халқаро академик ҳамжамиятда тарғиб этиш йўлидаги муҳим қадамлар эканини қайд этди.

Профессор Актоти Раимқулова сўзининг давомида китоб муаллифи профессор Ҳасан Ҳасановнинг юксак илмий салоҳияти ва ютуқларини алоҳида эътироф этиб, ушбу фундаментал асарнинг нашр этилиши Жамғарма фаолиятидаги муҳим воқеа эканини таъкидлади. Шунингдек, аввал рус ва венгер тилларида чоп этилган ушбу қимматли нашр илк бор озарбайжон тилида китобхонларга тақдим этилаётганини қайд этди.

Китобнинг яратилиш тарихи ҳақида сўзлаган таниқли дипломат профессор Ҳасан Ҳасанов тақдимот ташкилотчиларига ва барча иштирокчиларга миннатдорлик билдирди. У дипломатик фаолияти давомида турли мамлакатларда хизмат қилган даврларида туркий меросни ўрганишга доимо алоҳида эътибор қаратганини айтди. Муаллифнинг таъкидлашича, мазкур нашрда Гюла Немет, Лайош Лигети, Золтан Гомбоч каби машҳур венгер олимларининг туркий мерос ҳақидаги қарашлари чуқур илмий таҳлил қилинган бўлиб, у Венгрия ва туркий халқлар ўртасидаги тарихий алоқаларнинг нақадар чуқур эканини яна бир бор намоён этади.

Тадбирда Тамаш Торма — Венгриянинг Озарбайжондаги Фавқулодда ва Мухтор Элчиси, Ҳижрон Ҳусейнова — Озарбайжон Республикаси Миллий Мажлисининг Оила, аёллар ва болалар масалалари қўмитаси раиси, Озарбайжондаги Отатурк Маркази директори, академик Низомий Жафаров, Озарбайжонда хизмат кўрсатган санъат арбоби Исмайил Омаров, Озарбайжон Тиллар Университети профессори Севдагул Алиева ҳамда маданиятшунослик фанлари доктори Нигар Афандиева сўзга чиқиб, нашрнинг илмий аҳамиятини юксак баҳоладилар.

Тақдимотда Озарбайжон Республикасида аккредитациядан ўтган дипломатик корпус вакиллари, давлат ва жамоат арбоблари, илм-фан ва маданият намояндалари, халқаро ташкилотлар раҳбарлари ҳамда оммавий ахборот воситалари вакиллари иштирок этдилар.