Португалияда уй-жой нархлари ошишига қарши намойиш бўлиб ўтди

Португалиянинг 30 дан ортиқ шаҳар ва аҳоли пунктларида ўн минглаб киши уй-жой нархлари ва ижара ҳақининг кескин ошишига қарши норозилик намойишларида иштирок этди.

Associated Press нашри хабар беришича, намойишлар уй-жой муаммосига эътибор қаратиш мақсадида ташкил этилган.

Қайд этилишича, юришлар «Уй-жойга бўлган ҳуқуқимизни тортиб олишларига йўл қўймаймиз» шиори остида ўтказилган. Ёшлар ва нафақахўрлар иштирок этган акцияларда ижара ҳақи ошишини чеклаш, ижарачиларни мажбурий кўчиришдан ҳуқуқий ҳимоя қилишни кучайтириш ҳамда арзон уй-жойлар таклифини кўпайтириш талаб қилинган.

Айрим фаоллар Лиссабон ва Порту шаҳарларининг марказий майдонларида чодирлар ўрнатган. Махсус бўлинма ходимлари хизмат итлари ёрдамида намойишчиларнинг бир нечта гуруҳини тарқатган. Бу эса куч ишлатишнинг ҳаддан ташқари қўлланилгани ҳақидаги айбловларга сабаб бўлган.

Associated Press таъкидлашича, Португалияда норозилик намойишлари сўнгги бир неча ҳафта давомида ўтказилмоқда. Уларга ўтган ой қўшни Испанияда уй-жой харид қилиш имконияти чеклангани сабабли бошланган намойишлар туртки бўлган.

Евростат маълумотларига кўра, 2015–2025 йилларда Португалияда уй-жой нархларининг аҳоли даромадларига нисбати 61 фоизга ошган. Бу Европа Иттифоқи мамлакатлари орасидаги энг юқори кўрсаткич ҳисобланади. Бундан ташқари, 2020 йилдан буён мамлакатда ижара ҳақи 68 фоизга кўтарилган.

Кўчмас мулк нархларининг ошиши, жумладан, хорижлик харидорлар ва инвестиция фондлари фаоллигининг ортиши, Португалиянинг фрилансерлар ва нафақахўрлар орасида оммалашиши, шунингдек, туризм соҳаси ҳамда қисқа муддатли ижара хизматларининг ривожланиши билан боғланмоқда.

Мамлакат ҳукумати уй-жой инқирозини ҳал қилиш бўйича бир қатор чора-тадбирларни эълон қилган. Улар қаторига янги уй-жой қурилиши учун солиқларни камайтириш, қисқа муддатли ижарага чекловлар жорий этиш ва 145 мингта уй қуриш режаси киради.

Шу билан бирга, ҳукумат мазкур чора-тадбирларнинг натижалари дарҳол намоён бўлмаслигини тан олмоқда.