Португалия нашри: Паулу Бенту Ўзбекистон терма жамоасини бошқармайди

Португалиялик мураббий Паулу Бенту Ўзбекистон миллий терма жамоасини бошқариш таклифини рад этди. ЎФА мутахассисга жамоани 2026 йилги жаҳон чемпионатига тайёрлаш учун мўлжалланган шартнома таклиф қилган эди.

"A Bola" нашри хабарига кўра, Бенту таклифни қабул қилмади, чунки ўзбек томони тақдим этган шартлар унинг фаолиятининг бу босқичидаги мақсадларига мос келмаган.

56 ёшли мутахассис 2025 йил март ойида БАА терма жамоаси бош мураббийлигидан кетганидан сўнг клубсиз қолган. Унинг қўл остида жамоа Жаҳон чемпионатига чиқиш имкониятини сақлаб турган бўлса-да, шартнома муддатидан аввал бекор қилинган.

Бундан аввал Бенту Португалия ва Жанубий Корея терма жамоаларини ҳам бошқарган ва улар билан жаҳон ҳамда Европа чемпионатлари финал босқичига чиққан.