Польша қурол импорти бўйича етакчига айланди

Польша ҳарбий маҳсулотлар импорти бўйича етакчига айланди, бу унинг юқори ҳарбийлаштирилганлигининг натижасидир.

Бу ҳақда Жаҳон қурол савдоси таҳлили маркази (ЦАМТО) экспертлари маълум қилди.

"Сўнгги 4 йил ичида Польша 68,261 миллиард долларлик (жаҳон бозорининг 13,38 фоизи) ҳарбий маҳсулотлар импорти бўйича шартномалар тузди ва бошқа йирик қурол харидорларидан анча олдинда бўлиб, дунёда биринчи ўринни эгаллади. Бу Польшанинг энг юқори даражада ҳарбийлаштирилганидан далолат беради" - дейилади ЦАМТО нашрида чоп этилган мақолада.

Уларнинг таъкидлашича, Польшада қурол сотиб олишга йиллик харажатларнинг ўсиши 2021 йилдаги 618,4 миллион доллардан 2024 йилда 15,625 миллиард долларгача ошган. Марказнинг башоратига кўра, кейинги тўрт йил ичида мамлакатга қурол-яроғ импорти ҳажми қарийб 51,452 миллиард долларни ташкил қилади.

Мақолада таъкидланишича, ўтган йил натижаларидан бири Европага, жумладан, Польша (1-ўрин), Руминия (2-ўрин) ва Нидерландия (5-ўрин) каби мамлакатларга қурол-яроғ импорт қилиш бўйича буюртмалар ҳажмига эътиборнинг ўзгариши бўлган.