Полша Германияда жойлаштирилган АҚШ ҳарбийларини ўз ҳудудига қабул қилишга тайёр — Полша президенти

Анжей Дуда бу ҳақда Polsat телеканалига берган интервюсида маълум қилди.

Германия сиёсатчиларининг Европа АҚШдан мустақил ҳаракат қилиши кераклиги ҳақидаги баёнотларига изоҳ берар экан, Дуда "Германия АҚШ билан боғлиқ муносабатларини бизга топширсин", дея таклиф қилди.

"Биз уларни Германияда жойлашган Қўшма Штатлар қўшинлари билан биргаликда мамнуният билан қабул қиламиз", — дея қўшимча қилди Полша президенти.

Аввалроқ АҚШ вице-президенти Жей Ди Вэнс Вашингтон Германиядаги ҳарбий иштирокини қайта кўриб чиқиши мумкинлиги ҳақида баёнот берган эди.