Покистон ва Афғонистон оқсоқоллари ҳукумат иштирокисиз маҳаллий оташкесим сулҳига эришди

Афғонистон шарқидаги Кунар вилоятининг Покистон билан чегарадош айрим ҳудудларида ўт очишни тўхтатиш бўйича келишувга эришилди. Бу ҳақда маҳаллий манбаларга таяниб Amu TV хабар берди.

Маҳаллий аҳолининг сўзларига кўра, жангларни тўхтатиш бўйича келишувда Покистон ҳамда “Толибон” расмийлари иштирок этмаган.

Музокараларни чегаранинг ҳар икки томонидаги қабила оқсоқоллари олиб борган. Шу сабабли ушбу келишув қанчалик узоқ давом этиши номаълум.

Amu TV манбаларининг таъкидлашича, келишув вақтинчалик характерга эга ва ҳали якуний тўхтамга келинмаган. Ҳозирча на “Толибон” ва на Покистон расмийлари ушбу хабар юзасидан расмий муносабат билдирди.