Пискентда юк машинаси ва Isuzu тўқнашиши оқибатида 2 киши ҳалок бўлди

Тошкент вилоятининг Пискент туманида инсонлар ўлими билан боғлиқ ЙТҲ содир бўлди. Бу ҳақда Тошкент шаҳар ИИББ бошлиғининг матбуот котиби хабар берди.

Маълум қилинишича, ЙТҲ бугун, 17 март куни соат 6:30 ларда Пискент тумани ҳудудида содир бўлган. “Тошкент-Бекобод“ автомобил йўлида ҳаракатланиб кетаётган юк машинаси қарама-қарши йўналишга чиқиб кетган. Сўнгра Isuzu автомобили билан тўқнашган. Дастлабки маълумотга кўра, юк машинаси ҳайдовчиси транспорт бошқаруви пайтида ухлаб қолган.

ЙТҲ оқибатида юк машинаси ҳайдовчиси ва бир нафар йўловчиси олган тан жароҳатлари сабабли воқеа жойида вафот этган.

Воқеа жойига зудлик билан Тошкент вилояти ССБ малакали тиббий ходимлари, вилоят ИИББ, ФВБ ва бошқа ташкилот масъуллари жалб этилиб, ЙТҲнинг барча иштирокчиларига биринчи тиббий ёрдам кўрсатилган. Улар шифохонага етказилган.

ЙТҲ юзасидан қўшимча ўрганиш ва зарурий чора-тадбирлар кўрилаётгани билдирилди.