Пентагон Трампга Венесуэлага қарши операциялар режаларини тақдим этди

АҚШ ҳарбийлари президент Дональд Трампга Венесуэлага қарши потенциал операциялар, жумладан қуруқликдаги нишонларга зарбалар бериш бўйича янгиланган режаларни тақдим этди.

Бу ҳақда CBS телеканали манбаларга таяниб хабар берди.

Оқ уйда бўлиб ўтган учрашувда Пентагон котиби Пит Хегсет ва штаб бошлиқлари бирлашган қўмитаси раиси Дэн Кейн иштирок этди, дейилади хабарда. Улар Трампга яқин кунларда АҚШ ҳарбийлари томонидан амалга оширилиши мумкин бўлган ҳаракатлар ҳақида маълумот беришди.

Нашрнинг таъкидлашича, Вашингтон маъмурияти бу борада “якуний қарорлар” қабул қилмаган.

Ушбу потенциал операцияларнинг тафсилотлари берилмаган.

Оқ уй матбуот котиби Кэролин Левитт чоршанба куни журналистлар учун навбатдаги брифингда АҚШ куч ишлатишни давом эттириш ниятида эканлигини айтди, унинг мақсади Кариб денгизи минтақасида гиёҳванд моддалар савдосини тўхтатишга қаратилган.