Пашинян: «Трамп йўли» қурилиши – 2026 йилда бошланиши мумкин

Арманистон бош вазири лойиҳага оид бир қатор жиҳатларга тўхталди.

Арманистон АҚШ билан «Трамп йўли» учун ер майдонини ижарага бериш бўйича икки сценарийни муҳокама қилмоқда — 49 ёки 99 йиллик. Бу ҳақда Арманистон бош вазири Никол Пашинян Еревандаги минтақавий хавфсизлик конференциясида маълум қилди. Унинг сўзларини маҳаллий ОАВ тарқатган.

Эслатиб ўтамиз, таклиф қилинаётган йўл Арманистоннинг Сюник провинцияси орқали ўтади. У Озарбойжонни унинг эксклави — Нахчаван Автоном Республикаси билан боғлайди.

Илгари 8 август куни Вашингтонда имзоланган декларацияда ижара муддати 99 йил деб кўрсатилган эди.

Арманистон бош вазири муддатлар инвестициялар ва уларнинг қайтарилиши билан боғлиқлигини тушунтирди. Унинг сўзларига кўра, «инвестор ўз сармоясини муайян фойда билан қайтариб олиш кафолатига эга бўлиши керак».

Пашинян лойиҳа доирасида темир йўл маршрутига оид ўз қарашларини ҳам тақдим этди. Унинг сўзларига кўра, йўл Озарбойжондан Мегрига, сўнгра Нахчавонга, ундан Ерасхқа ва Туркия чегараси — Ахурикагача ўтиши керак.

«Фақат кичик бир участка қолди, уни тиклаш талаб этилади ва биз бу ишни бошладик», — деди Пашинян. Шунингдек, у Озарбойжонда Карсни Нахчавон билан боғлайдиган темир йўл қурилиши бошланганини қўшиб ўтди.

«Вашингтон тинчлик саммити миллиардлаб сармоядан тежаш имконини беради, чунки шу йўл Ахурик–Ерасх линияси орқали ҳам таъминланиши мумкин. Албатта, биз бу йўналишда ишлаяпмиз», — деди Арманистон бош вазири.

Пашинян жараёнда АҚШ президенти Дональд Трампнинг ролига яна эътибор қаратди.

«Ҳа, олдинги даврда армян-озарбойжон тинчлик жараёни ижобий динамика кўрсатган, лекин аниқ қийинчиликлар ҳам бўлган. Келишувга эришишда Трампнинг шахсий иштироки ҳал қилувчи аҳамиятга эга бўлган.

Бизнинг график: йил охиригача юридик масалаларни якунлаш ва матнни аниқ шаклга келтириш; 2026 йилнинг биринчи ярмида келишувдан келиб чиқадиган барча қарорларни қабул қилиш; 2026 йилнинг иккинчи ярмида қурилиш ишларини бошлаш.

Лойиҳани амалга оширишга ҳеч нарса тўсқинлик қилмайди, чунки барча баҳсли масалалар Вашингтон декларациясида акс эттирилган. Бизга фақат келишувни бажариш қолади», — деди Арманистон бош вазири.