Паранжи ва никоб: «цивилизация масаласи»ми?

Италияда мигрантлар интеграцияси қоидалари кучайтирилмоқда.

Италия бош вазири Жоржа Мелони ҳукумати мактабларда мигрантларни интеграция қилишга қаратилган янги қоидаларни тасдиқлади.

Янги тартибга кўра, бир синфда итальян тилини етарлича яхши билмайдиган ўқувчилар сони 30 фоиздан ошмаслиги керак. Бу, асосан, мамлакатга яқинда келган хорижлик ўқувчиларга тааллуқли. Квотани белгилашда боланинг Италияда туғилгани ва итальян мактабида қанча вақт ўқигани ҳам ҳисобга олинади.

Итальян тилини етарлича билмайдиган ўқувчиларнинг ота-оналари бепул тил курсларида қатнашиши шарт бўлади. Дарсларга қатнашишдан бош тортган ёки белгиланган минимал даражага эриша олмаган ота-оналарга 1000 еврогача жарима солиниши мумкин.

Мелони аввалроқ бундай ислоҳот зарурлигини синфларда итальян тилини тушунмайдиган ўқувчилар сони кўпайса, интеграция жараёни қийинлашиши билан изоҳлаган эди.

Бундан ташқари, мактабларда юзни тўлиқ ёпадиган исломий бош кийимлар — жумладан, паранжи ва никоб тақишни тақиқлаш режалаштирилмоқда.

Италия таълим вазири буркани аёлларни камситувчи патриархал қарашлар рамзи деб атаган ва тақиқни «цивилизация масаласи» сифатида таърифлаган.

Фарзандини мазкур тақиқ сабабли мактабга юбормай қўйган ота-оналарга нисбатан жиноий жавобгарлик, жумладан, қамоқ жазоси ва ота-оналик ҳуқуқидан маҳрум қилиш чоралари қўлланиши мумкин.