“Озодлик радиоси” USAGM'ни судга берди

АҚШнинг Глобал Медиа Агентлиги (USAGM) ва унинг икки мансабдори — Кери Лейк ва Виктор Моралесга қарши даъво “Озодлик радиоси” (RSE/RS) учун федерал грантни тўхтатишга уринишлари сабабли судга берилган.

Колумбия округ судига берилган даъво аризасида “Озодлик радиоси”ни Конгресс томонидан ажратилган маблағлардан маҳрум қилиш федерал қонунларни, жумладан, АҚШ Конституциясини бузиши таъкидланган. Конституция федерал харажатлар бўйича ваколатни фақат Конгрессга беришини белгилaйди.

"Қонун биз томонда эканига ишонамиз ва бутун дунёдаги мустабид тузумларнинг бизнинг тугашимизни нишонлашларига эрта", — деди “Озодлик радиоси” бош директори Стивен Капус.

Аввалроқ, Мэриленд штати округ судяси Теодор Чуан АҚШ Ҳукумат самарадорлиги департаменти (DOGE) томонидан, Илон Маск ташаббуси билан амалга оширилаётган USAID'ни тугатиш жараёнини тўхтатиш ҳақида қарор чиқарган эди.

Молиялаштиришнинг қисқариши натижасида агентлик ходимлари мажбурий таътилга чиқарилган ёки ишдан бўшатилган.

Чуаннинг таъкидлашича, USAID'ни тугатиш ва DOGE’нинг ҳаракатлари катта эҳтимол билан АҚШ Конституциясининг бир неча бандларини бузади.