Олимпиадада россиялик қиз Германия учун олтин медални қўлга киритди

Бадиий гимнастика бўйича Германия терма жамоаси сафида қатнашаётган Даря Варфоломеева биринчи ўринни эгаллади. 17 ёшли спортчи жаҳон чемпионатларида аллақачон олтита олтин медалга эга.

9 август, жума куни Германия терма жамоаси учун курашган, асли келиб чиқиши россиялик бўлган Даря Варфоломеева Париждаги Олимпиадада бадиий гимнастика бўйича кўпкураш баҳсларида олтин медални қўлга киритди. Тўртта машқда шмиденлик 17 ёшли спортчи жами 142,850 балл тўплади ва натижада Германиянинг ушбу спорт тури бўйича илк Олимпия олтинини қўлга киритди.

Иккинчи ўринни болгариялик Боряна Калейн (140,600), учинчи ўринни италиялик София Раффаэли (136,300) эгаллади.

Варфоломеева Барнаулда туғилган. Россияда гимнастикачи турли ўсмирлар мусобақаларида қатнашган ва 2019 йилда ота-онаси билан Германияга кўчиб ўтган ҳамда спорт фуқаролигини ўзгартирган.

Варфоломеева жаҳон чемпионатларида (2022, 2023) олтита олтин, тўртта кумуш ва битта бронза, Европа чемпионатида (2022, 2023, 2024) иккита олтин ва учта бронза медалига эга.

Эслатиб ўтамиз, Парижда россиялик гимнастикачилар Россиянинг Украинага ҳужуми туфайли Олимпия ўйинларида иштирок этишига рухсат берилмаганидан кейин Россия терма жамоаси нейтрал мақомда чиқишдан бош тортди.