ОЧЛ2. “Насаф” Қаршида “Ал-Ваҳда”га имкониятни бой берди

Осиё чемпионлар лигаси-2 гуруҳ босқичининг 2-турида Қаршининг “Насаф” клуби Бирлашган Араб Амирликларининг “Ал-Ваҳда” жамоасини қабул қилди. Қизиқарли ва кескин вазиятларга бой ўтган учрашув меҳмонларнинг 2:1 ҳисобидаги ғалабаси билан якунланди.

Биринчи бўлим: бой берилган имкониятлар ва Круспскининг дубли

Мезбонлар дастлабки дақиқаларданоқ ташаббусни ўз қўлига олишга интилди. “Насаф” футболчилари рақиб жарима майдони атрофида бир қатор хавфли вазиятлар яратган бўлса-да, ҳужумларни самарали якунлай олмади.

21-дақиқада эса меҳмонлар ўз имкониятидан унумли фойдаланди. Факундо Круспски аниқ зарба билан ҳисобни очиб, БАА клубини олдинга олиб чиқди.

35-дақиқада қаршиликларда мувозанатни тиклаш учун қулай имконият пайдо бўлди. Ҳакам “Ал-Ваҳда” дарвозаси томон пенальти белгилади, бироқ Абдувоҳид 11 метрлик жарима зарбасини голга айлантира олмади.

Орадан уч дақиқа ўтиб, Круспски узоқ масофадан йўллаган зарбаси билан иккинчи голини урди. Шу тариқа, меҳмонлар танаффусга икки тўп фарқи билан йўл олди.

Иккинчи бўлим: “Насаф”нинг жавоб голи

Танаффусда мураббийлар штаби таркибга иккита ўзгариш киритди. Бу қарор майдондаги вазиятга ижобий таъсир кўрсатди ва иккинчи бўлим бошида мезбонлар ҳисобдаги фарқни қисқартиришга муваффақ бўлди.

Сардорбек Бахромовнинг голи “Насаф”ни ўйинга қайтарди — 1:2.

Шундан кейин қаршиликлар ҳужумлар суръатини ошириб, дуранг учун курашди. Меҳмонлар эса асосий эътиборни ҳимояга қаратиб, мавжуд устунликни сақлаб қолишга ҳаракат қилди.

Якуний дақиқаларда “Насаф” босимни кучайтирганига қарамай, “Ал-Ваҳда” ҳимоясини иккинчи бор енгишнинг уддасидан чиқа олмади. Ҳакам томонидан қўшиб берилган тўрт дақиқа ҳам натижани ўзгартирмади.

Шу тариқа, “Насаф” гуруҳ босқичининг иккинчи турида ўз мухлислари қаршисида 1:2 ҳисобида мағлубиятга учради.

Осиё чемпионлар лигаси-2. “А” гуруҳи, 2-тур

“Насаф” (Ўзбекистон) — “Ал-Ваҳда” (БАА) — 1:2

Голлар: Факундо Круспски (21, 38) — Сардорбек Бахромов (53).