Очарчилик сабабли фаластинликлар Ғазо секторидаги БМТ омборига бостириб киришди

Бу ҳақда Бирлашган Миллатлар Ташкилотининг Жаҳон озиқ-овқат дастури (WFP) ўзининг Х ижтимоий тармоғидаги саҳифасида маълум қилди.

"Исроил қамали туфайли очликдан азият чекаётган одамлар тўдаси БМТ Жаҳон озиқ-овқат дастурининг Дейр ал-Балаҳ шаҳридаги омборига бостириб кирди. Ҳодиса натижасида икки киши ҳалок бўлди, бир нечта одам яраланди. Ғазода озиқ-овқат ва бошқа ёрдам етказилиши тўхтаган 80 кунлик тўлиқ блокададан сўнг гуманитар эҳтиёжлар назоратдан чиқиб кетди", дейилади ташкилот баёнотида.

БМТ гуманитар ташкилотлар учун Ғазо секторига хавфсиз ва тўсқинликсиз кириш имкониятини дарҳол таъминлашга чақирди.

Бунга жавобан, бир кун олдин Исроил мудофаа армияси (ЦАХАЛ) минтақадаги гуманитар инқироз учун БМТнинг ўзини айблаган эди. ЦАХАЛ маълумотига кўра, 400 та гуманитар ёрдам ортилган юк машинаси Ғазода БМТ томонидан тақсимланишини кутиб турибди.