Нью-Йорк полицияси сўнгги ўн йилликлардаги энг йирик кокаин партиясини мусодара қилди

Нью-Йорк полицияси сўнгги ўн йилликлардаги энг йирик кокаин мусодара қилиш операцияларидан бирини ўтказди.

Лонг-Айленд-Ситидаги омборхонадан 580 фунт, яъни қарийб 250 килограмм кокаин олиб қўйилди. Унинг қиймати тахминан 10 миллион долларга баҳоланмоқда. Бу ҳақда Нью-Йорк полицияси комиссари Жессика Тиш маълум қилди.

Полиция маълумотига кўра, Нью-Жерсида яшовчи 35 ёшли Нельсон Сальседо фургонга кокаин солинган қутиларни юклаётган пайтда қўлга олинган. Автомобил ичида ва унинг атрофидан 230 та ўрам наркотик модда жойланган 19 та қути топилган. Тезкор тест уларда кокаин борлигини тасдиқлаган.

Тергов версиясига кўра, мусодара қилинган наркотиклар картеллардан бири билан боғлиқ бўлиши мумкин.

«Бу штатлараро наркотик савдоси тармоғи билан боғлиқ жуда йирик партия эди. Терговчиларнинг иши туфайли бу наркотиклар Нью-Йорк кўчаларига етиб бормайди», — дея Жессика Тишнинг сўзларини келтиради New York Post.

Қайд этилишича, полиция Сальседони 12 августдан буён кузатиб келган. У камида икки марта наркотик етказиб берган, учинчи уриниш пайтида эса қўлга олинган.

Операция давомида яна икки киши ҳибсга олинган. Сальседога наркотик моддаларни сақлаш бўйича айблов қўйилди. Товарни қабул қилиши керак бўлган шахс эса ҳозирча қўлга олинмаган.