Нидерландия мудофаа вазири Рубен Брекелманс агентликка берган интервьюсида Россия томонидан Украинада кимёвий қуролдан кенг кўламда фойдаланилгани ҳақида тасдиқланган далиллар мавжудлигини маълум қилди.
«Бу жиддий хавотир уйғотади. Биз кимёвий қуролдан фойдаланиш Россия армияси учун одатий, стандарт ва кенг тарқалган амалиётга айланиб бораётганини кўряпмиз», — деди Брекелманс.
Унинг сўзларига кўра, Нидерландия разведкаси хлорпикрин ва кўз ёши оқизувчи газ каби моддалардан тизимли равишда фойдаланилаётганини тасдиқлайдиган маълумотларни жамлаган. Вазир камида уч украин аскарининг ўлими кимёвий моддалар билан боғлиқ эканини, шунингдек, 2500 дан ортиқ яраланганлар бундай таъсирга хос аломатлардан шикоят қилганини айтди. Шунингдек, Украина томонидан 9000 та шунга ўхшаш ҳодиса қайд этилган.
Нидерландия ҳарбий разведкаси раҳбари Питер Рисинк таъкидлашича, гап алоҳида ҳодисалар ҳақида эмас, балки Россиянинг марказлашган дастури ҳақида бормоқда.
«Бу фронтда тасодифан амалга оширилаётган ҳаракатлар эмас, балки марказлаштирилган ва режалаштирилган дастурнинг бир қисми», — деди у.
Унинг таъкидлашича, Россияда кимёвий қурол ишлаб чиқариш салоҳияти оширилмоқда, ҳамда олимлар янги моддалар яратиш учун жалб қилинмоқда. Масалан, ОЗХЗ (Кимёвий қуролларни тақиқлаш ташкилоти) томонидан тақиқланган хлорпикрин моддаси дронлар орқали ампулалар ёки шишаларда самодий қурол сифатида қўлланилмоқда.
«Бу Россия армияси учун деярли стандарт амалиётга айланиб бўлган», — деди Рисинк.
У шунингдек огоҳлантирди:
«Агар биз буни ўз номи билан айтмасак, бу янги меъёрга айланади.»
Шу муносабат билан, Нидерландия мудофаа вазири халқаро ҳамжамиятни Москвага нисбатан босимни кучайтиришга ва Россияни ОЗХЗнинг Ижроия кенгашидан чиқаришга чақирди.
Маълумот учун: Хлорпикрин нафас йўллари, кўз ва терида кучли озор келтиради, ёниб кетиш ва оғир заҳарланишга олиб келиши мумкин. АҚШ ва Буюк Британия бу моддадан фойдаланилганини Россияга қарши санкцияларнинг асосларидан бири сифатида кўрсатган.
Элдор Шомуродовнинг янги жамоаси маълум. У Италиядан кетмоқда
Россияда кучли зилзила содир бўлди
Chevrolet янги Tracker 2026’ни тақдим этди
