Нетаньяху: "Исроил Ғазо бўйича дипломатияга рози, аммо куч ишлатишга ҳам тайёр"

Исроил Ғазо секторидаги можарони дипломатик йўл билан ҳал қилишга рози.

Бу ҳақда бош вазир Беньямин Нетаньяху АҚШга ташрифи чоғида маълум қилган; унинг исроилликларга мурожаати акс этган видеоёзув бош вазир идораси томонидан тарқатилди.

Нетаньяхунинг таъкидлашича, Исроил анклавда 60 кунлик ўт очишни тўхтатишга рози, аммо тўлиқ демилитаризация ва Фаластиннинг ХАМАС ҳаракати сектордаги ҳокимиятдан олиб ташланишини талаб қилмоқда. Агар дипломатия муваффақиятсизликка учраса, Исроил бу мақсадига ҳарбий йўл билан эришмоқчи, деди Бош вазир. Унинг қайд этишича, 9 июль куни у Ғазода гаровга олинганларнинг қариндошлари гуруҳи билан АҚШда бўлиб ўтган учрашувда бу позициясини баён қилган.

"Биз барча ўғирланган одамларни қайтаришга қарор қилдик, мен уларга айтдим. Мен уларга 60 кунлик ўт очишни тўхтатиш эвазига ҳозир тирик ва ўлик гаровга олинганларнинг ярмини озод қилишга ҳаракат қилаётганимизни айтдим. Бу сулҳнинг бошида биз урушни бутунлай тугатиш, яъни доимий ўт очишни тўхтатиш бўйича музокараларни бошлаймиз. Бунга эришиш учун унинг минимал шартларини бажаришимиз керак: Ҳа Ғазо қуролсизланган, у ерда энди ҲАМАСнинг маъмурий ёки ҳарбий салоҳияти йўқ, бу бизнинг асосий шартларимиз”, деди бош вазир.

"Агар музокараларда бунга эришиш мумкин бўлса, шунча яхши. Агар 60 кундан кейин музокараларда бунга эришилмаса, биз бунга қаҳрамон армиямизнинг кучидан фойдаланиб, бошқа йўллар билан эришамиз", - дея қўшимча қилди Нетаньяху.

Унинг эслатишича, яқинда худди шундай ёндашув Теҳроннинг ядровий дастури бўйича музокаралар учун 60 кун вақт ажратган Қўшма Штатлар томонидан қўлланилган ва 13 июнь куни Исроил Эронга қарши 12 кунлик ҳарбий операция бошлаган. "Биз Эрон ва ядровий таҳдидни йўқ қилиш ҳақида ҳам худди шундай дедик. Ўйлайманки, биз барча мақсадларимизга эришиш учун қатъиятимиз, кучимиз ва содиқлигимизни намойиш қилдик. Яна бир бор: агар музокаралар орқали демилитаризация ва ХАМАСнинг салоҳиятини йўқ қилишга эришилса, шунча яхши. Лекин ҳар қандай ҳолатда ҳам уларга эришилади", - дейди Нетаньяху.