Нега Европа бўйлаб норозилик намойишлари ва тартибсизликлар авж олмоқда?

Европанинг бир қатор мамлакатларида турмуш қийматининг ошиши, таълим соҳасидаги муаммолар ва ҳукумат сиёсатига қарши намойишлар бўлиб ўтди. Италия, Бельгия ва Албанияда намойишлар полиция билан тўқнашувларга айланган бўлса, Франциянинг бир нечта шаҳрида оммавий чиқишлар ёнғинлар ва талон-торожлар билан кечган тартибсизликларга олиб келди.

Италия. Милан ва Болонья шаҳарларида намойишчилар, жумладан, нархлар ошишига қарши чиқиб, полицияга тош ва петардалар отган. Миланда айрим гуруҳлар баррикадаларга ўт қўйиб, дўконларни талон-торож қилган. Полиция намойишчиларни куч ишлатиб тарқатган.

Бельгия. Брюссель ва Льеж шаҳарларида талабалар таълим харажатларининг ошиши ва олий таълим олиш имкониятларини чеклаши мумкин бўлган ислоҳотларга қарши намойиш ўтказган. Брюсселда айрим иштирокчилар полиция ходимларига шиша идишлар ва бошқа буюмларни отган. Ҳуқуқ-тартибот идоралари кўздан ёш оқизувчи газ ва сув пуркагичлардан фойдаланган.

Албания. Пойтахт Тиранада ҳукуматга қарши чиқишлар давом этган. Минглаб ёшлар бош вазир Эди Рама истеъфосини талаб қилиб, коррупция ва ишсизликка қарши норозилик билдирган. Тўқнашувлар вақтида айрим иштирокчилар полицияга тош ва ёнувчи аралашма солинган шишаларни отган. Полиция кўздан ёш оқизувчи газ, шовқинли гранаталар ва сув пуркагичлардан фойдаланган. Ҳафта бошида намойишчилар ҳукумат биноларига ҳам ўт қўйган эди.

Франция. Энг йирик тартибсизликлар Францияда кузатилган. Мамлакат Ички ишлар вазирлиги маълумотига кўра, 17 октябрь куни намойишларда тахминан 550 минг киши иштирок этган. CGT касаба уюшмаси эса иштирокчилар сонини 800 минг нафар деб баҳолаган.

Мамлакатнинг айрим шаҳарларида намойишчилар биноларга ўт қўйган, дўконларни талон-торож қилган ва полиция билан тўқнашган. ОАВ хабарларига кўра, қўлга олинганлар сони 1200 нафардан ошган.

Қайд этилишича, ушбу мамлакатлардаги намойишлар ягона умумевропа ҳаракати бўлмаган ва иштирокчиларнинг талаблари бир-биридан фарқ қилган. Бироқ уларни турмуш харажатларининг ортиши, давлат хизматларидаги муаммолар ва ҳукумат қарорларидан норозилик каби умумий омиллар бирлаштирган.