НАТО бош котиби: Россия президентини “ҳал қилувчи босим” орқали ўт очишни тўхтатишга рози қилиш мумкин

НАТО бош котиби Марк Рютте таъкидлашича, “доимий ва қатъий босим” орқали Россия президенти Владимир Путинни ўт очишни тўхтатиш ва музокараларни бошлашга кўндириш мумкин.

Оқ уйда АҚШ президенти Дональд Трамп билан учрашувдан сўнг Рютте музокараларни “жуда самарали” деб баҳолади. Унинг сўзларига кўра, томонлар НАТОнинг Россия ва Украина ўртасидаги урушни тугатишдаги роли, шунингдек, Путинни ўт очишни тўхтатиш шартларини қабул қилишга мажбурлаш чораларини муҳокама қилган.

Рютте шундай деди:

“Мен доимий ва қатъий босим орқали биз Путинни музокаралар столига ўтқазиш ва келишув жараёнини бошлашга мажбур қила олишимизга ишонаман”.

У, шунингдек, Трамп ва Путин ўртасидаги муносабатлар ҳал қилувчи аҳамият касб этишини таъкидлади:

“Трамп — Путинни музокаралар столига олиб келиши ва уни ўз позициясини ўзгартиришга мажбур қилиши мумкин бўлган ягона лидер. Биз унга бунда озгина бўш жой бериб, ҳаракат қилиш имконини бермоғимиз керак”.

НАТО бош котибининг сўзларига кўра, АҚШ Украинага хавфсизлик кафолатларини таъминлашда яна фаол иштирок этаётгани қайд этилди. У Вашингтоннинг Канада, Япония, Австралия ва Европадаги иттифоқчилари билан яқин ҳамкорликда иш олиб бораётганини таъкидлади.

Трамп эса Рютте билан учрашуви давомида Россия ва Украина ҳануз келишувга эриша олмаганидан “чуқур умидсизлик” билдириб, Москвага қарши иқтисодий санкцияларни кучайтириш эҳтимолига ишора қилди.

“Вақт келганини ҳис қилдим. Биз узоқ кутдик. Бу жуда қаттиқ санкциялар”, — деди у “Роснефть” ва “Лукойл” компанияларини санкциялар рўйхатига киритиш ҳақидаги қарорни изоҳлар экан.