Москва Европадаги ҳарбий заводлар бўйича кескин баёнот берди

Россия Ташқи ишлар вазирлиги Украина учун қурол ишлаб чиқараётган Европа корхоналари Москва томонидан потенциал ҳарбий нишон сифатида кўрилиши мумкинлигини билдирди.

Россия ТИВ расмий вакили Мария Захарова 30 сентябрь куни ўтказилган брифингда бу ҳақда Польша ҳудудида Patriot ракеталарини ишлаб чиқариш имкониятига оид саволга жавоб берар экан маълум қилди.

Унинг таъкидлашича, Украина учун қурол-яроғ ишлаб чиқарадиган корхоналар Украина ҳудудидан ташқарида жойлашгани уларнинг хавфсизлигини кафолатламайди. Захарова Европа давлатларининг Киевга ҳарбий ёрдамини можарога бевосита жалб бўлиш сифатида баҳолади. НАТО ва Европа давлатлари эса Украинага ҳарбий ёрдамни Россия ҳужумидан ҳимояланишга кўмак сифатида изоҳлаб келади.

Брифингда Молдова мавзуси ҳам кўтарилди. Захарова мамлакат қиш мавсумига етарли даражада тайёр эмаслигини даъво қилиб, Кишинёв ҳукуматининг энергетика сиёсатини танқид қилди. У 1 сентябрдан газ тарифлари 40 фоиздан ортиқ ошгани ва 1 октябрдан яна 30 фоизлик ўсиш режалаштирилганини айтди. Бу рақамлар Россия ТИВ вакилининг баёноти сифатида келтирилмоқда.

Шунингдек, Россия томони Молдова Украина учун қурол ва ҳарбий юклар транзитида фойдаланилаётгани ҳақида даъво қилди. Бу баёнот бўйича мустақил тасдиқланган далиллар ҳозирча очиқ манбаларда келтирилмаган.

Захарова Россия ва Беларусь ўртасидаги транспорт алоқаларига ҳам тўхталди. 1 октябрдан Минск — Москва йўналишидаги "Ласточка" поездларининг "Москва-Сити" бекатида тўхташи жадвалга киритилган.