Microsoft ходимлари Исроилга қарши норозилик намойишлари сабабли қўлга олинди

Америка Қўшма Штатларининг Редмонд шаҳрида жойлашган Microsoft корпорацияси қароргоҳида ўтказилган Исроилга қарши норозилик намойишлари пайтида камида етти киши, жумладан икки фаол ходим ва уч нафар собиқ ходим, шунингдек, IT соҳасининг яна икки вакили қўлга олинди. Бу ҳақда The Guardian хабар берди.

Норозилик акцияси иштирокчилари Microsoft'дан Исроил ҳукумати билан ҳамкорликни тўхтатишни талаб қилган. Улар компания президенти Брэд Смитнинг офисида ўтириб олиш акцияси ташкил қилганлар. Қолган иштирокчилар эса бино ташқарисида йиғилган.

Акция ташкилотчиларидан бири, Microsoft’нинг собиқ ходими Абдо Моҳамеднинг таъкидлашича, полиция махсус жилетларда келиб, намойишчиларни бино ичидан кўтариб чиқарган.

«Ни қўлга олиш, ни зўравонлик бизга тўсқинлик қилолмайди. Биз ҳақиқатни гапиришда давом этамиз», — деди Абдо Моҳамед.

Ҳозирча Microsoft компанияси ушбу воқеага расмий муносабат билдирмади.