Microsoft Windows учун 2024 йилнинг энг яхши иловалари эълон қилинди

Microsoft компанияси Microsoft Store Awards анъанавий танлови доирасида Windows учун 2024 йилнинг энг яхши иловаларини аниқлади. Натижалар компания блогида эълон қилинди.

Танлов жами 14 йўналиш, жумладан, ўйинлар, бизнес-дастурлар, сунъий интеллект ва ижтимоий тармоқларни қамраб олди. Танловда фақат Microsoft Store расмий дўконида мавжуд иловалар қатнашди.

Дижейлар мусиқа ва сетлар яратишда фойдаланувчи dJay Pro Algoriddim нейротармоқли утилитаси сунъий интеллектли энг яхши дастур деб топилди.

«Ҳаёт тарзи» тоифасида смартфон, планшет, ноутбук ва булутли сақлагичлар билан синхрон ишловчи шахсий кундалик — Diarium тенгсиз бўлди

«Молия» йўналиши ғолиблиги валюталар, акциялар, криптовалюталар курсларини кузатиб бориш, молия янгиликлари ва таҳлиллари билан танишиш имконини берувчи TradingView иловасига насиб этди.

Тақдимотлар яратиш, лойиҳалар устида биргаликда ишлаш, онлайн учрашувларни ташкиллаштиришда қўлланилувчи Gamma иловасини компания энг яхши бизнес-дастур деб топди.

Шунингдек, бошқа ғолиблар:

• Таълим — Typing Land;
• Сермаҳсуллик — Todoist;
• Энг яхши мусиқий илова — Apple Music;
• Энг яхши тиббий илова — Complete Anatomy 2024;
• Дастурчилар учун энг яхши восита — oh-my-posh;
• Саломатлик ва фитнес — f.lux;
• Креативлик — Adobe Express;
• Windows учун энг яхши ижтимоий тармоқ — Pinterest;
• Энг яхши ўйин — Asphalt Legends Unite;
• «Янги юлдуз» — Endel Music (иш, медитация ва таълим учун мусиқалар генерация қилувчи илова).

Ғолиб иловаларнинг муаллифларига Microsoft эксклюзив нишонлари, Microsoft Store бош саҳифасидаги опциялардан бепул фойдаланиш имконияти ҳамда Surface Pro 11 компютерлари топширилади.