Microsoft Исроил армияси билан ҳамкорликка норозилик билдиргани учун ходимларини ишдан бўшатди

Microsoft корпорациясининг 50 йиллиги муносабати билан ўтказилган урушга қарши намойишдан сўнг икки ходим ишдан бўшатилди. Дастурий таъминот муҳандиси Ибтихал Абусад компанияни Исроил армияси билан сунъий интеллект соҳасида ҳамкорлик қилиш орқали Ғазодаги геноцидга алоқадорликда айблади.

У ўз норозилигини Microsoft AI бошлиғи Мустафо Сулаймоннинг нутқи давомида омма олдида билдирди .

Компания ишдан бўшатишни "эътиборни қаратиш ва тадбирни бузиш" уриниши билан изоҳлади. Иккинчи намойишчи Вания Агравал ўз истеъфосини топширганидан сўнг муддатидан олдин ишдан бўшатилди.

No Azure for Apartheid кампаниясига кўра, Microsoft ўзининг Azure платформаси орқали Исроилга булутли технологияни тақдим этади ва АP хабарига кўра, технология Ғазо ва Ливандаги ҳаво ҳужумлари пайтида нишонларни аниқлаш учун ишлатилган.

Компания фикр билдириш учун очиқлигини, бироқ иш жараёнларининг бузилишига тоқат қилмаслигини айтади. Microsoft'даги норозилик IT- секторидаги урушга қарши норозилик тўлқинининг бир қисми эди: шунга ўхшаш кампания аввал Google'да Project Nimbus'га қарши норозилик акцияси доирасида бўлиб ўтган эди.