Лионель Мессининг Аргентина миллий терма жамоаси сафидаги хайрлашув учрашуви олдидан ташкилий масалалар билан боғлиқ норозиликлар пайдо бўлди.
Аргентиналик ҳужумчи яқин кунларда «Монументаль» стадионида «альбиселесте» либосида сўнгги бор майдонга тушиши кутилмоқда. Бироқ Goal нашри маълумотига кўра, Бенинга қарши учрашувга тайёргарлик жараёни меҳмон жамоанинг эътирозларига сабаб бўлган.
Бенин делегацияси, хусусан, Аргентинага етиб келиш ва жойлашиш шароитларидан қониқмаган.
Бундай ҳолат аввал ҳам кузатилган. Буркина-Фасо терма жамоаси футболчилари Аргентина томони таклиф этган эконом-класс рейсида Буэнос-Айресга учишдан бош тортган эди. Натижада асосий таркиб ўрнига U-23 жамоаси майдонга тушган.
Манбага кўра, буркина-фасоликларнинг норозилиги узоқ сафар учун яратилган шароитлар ҳамда ўйинда иштирок этганлик учун қўшимча тўлов масаласи билан боғлиқ бўлган.
Энди Бенин томони ҳам шунга ўхшаш муаммоларни кўтармоқда. ОАВ хабарларида айтилишича, делегация Аргентинага етиб бориш учун эконом-классда қарийб 23 соат йўл босган.
Бундан ташқари, жамоа жойлашган меҳмонхонада ҳам бир қатор камчиликлар кузатилгани айтилмоқда. Хусусан, қаватлардан бирида иссиқ сув бўлмаган, сауна ишламаган ва футболчиларнинг машғулот ўтказиши учун яратилган шароитлар талаб даражасида бўлмаган.
Шу тариқа, Мессининг миллий жамоадаги эҳтимолий сўнгги учрашувига бўлган катта қизиқиш фонида баҳс ташкилотчилиги билан боғлиқ эътирозлар ҳам кун тартибига чиқмоқда.
Майк Тайсон Трампнинг таклифига биноан Оқ уйга ташриф буюрди (фото)
Роналдунинг севгилиси Мессининг оиласига учта сўз билан мурожаат қилди
Расман: Испаниялик мураббий Ўзбекистон терма жамоасини тарк этди
