Машарипов Криштиану билан муносабати ҳақида гапирди

Ўзбекистон миллий жамоаси яримҳимоячиси Жалолиддин Машарипов россиялик журналист Нобел Арустамянга интервю бериб, «Ан-Наср»даги Криштиану Роналду билан муносабати ҳақида гапирди.

«Мен 7-рақамли либосни Роналдуга беришни истамаганим ҳақидаги гаплар ёлғон. Ўшанда «Ан-Наср» президенти мени чақириб, улар Роналду билан музокара олиб бораётгани ва у келиши мумкинлигини айтишганди. Ўшанда Криштиану келса, унга 7-рақамли либосни топширишим кераклигини дарҳол тушунгандим. Раҳбарият ҳам бу тўғри қарор бўлишини айтишди. Уларга ҳеч шубҳасиз 7-рақамни унга топширишимни, у энг ҳурматга лойиқ буюк ўйинчи эканини айтдим. Дунёда фақат иккита топ-футболчи бўлса бири Роналду, бири Месси. Ўшанда кўп жойда ўзим ҳақимда ёзилган турли нотўғри гапларга кўзим тушди, гўёки мен 7-рақамни беришни истамаган эканман, Роналду мени жамоадан четлатмоқчи бўлган экан. Аммо бу гаплар ёлғон эди.

Жамоадан кетганимдан кейин ҳам Роналдуга қарши ОЧЛ ўйинида майдонга тушганимда ҳам, у ёнимга келиб мен билан жуда яхши муносабатда бўлди, ўзаро суҳбатлашдик. У мени қаттиқ ҳурмат қилади», - деди Жалолиддин Машарипов.

Эслатиб ўтамиз, Машарипов 2021-23 йиллар давомида Саудия Арабистонининг «Ан-Наср» шарафини ҳимоя қилган эди.