Марказий банк банкларни кредит жарималари бўйича огоҳлантирди

Марказий банк томонидан тижорат банкларининг кредит шартномаларида тўловлар кечиктирилганда қўлланилаётган жарима ва санкциялар атрофлича таҳлил қилинди. Ўрганишлар айрим банклар амалиётида адолат ва мутаносиблик тамойиллари бузилаётганини кўрсатди.

Таҳлиллар натижасида айрим тижорат банкларида кечиктирилган тўловлар учун ҳисобланадиган фоиз ставкалари шартномада белгиланган йиллик ставкадан бир неча баробарга оширилаётгани аниқланди. Айрим ҳолатларда бу кўрсаткичлар йиллик 150–180 фоизгача етгани қайд этилди.

Шунингдек, кредит бўйича фоизларни тўлаш кечиктирилган тақдирда энг юқори чегараси белгиланмаган кунлик пеня ҳисобланаётгани, кредиторнинг реал харажатлари билан боғлиқ бўлмаган қўшимча бир марталик жарималар қўлланилаётгани ҳам маълум бўлди.

Мазкур ҳолатлар юзасидан Марказий банк банкларга муҳим тавсиялар берди.

Хусусан, кечиктирилган мажбуриятлар учун қўлланиладиган санкциялар компенсацион характерга эга бўлиши лозимлиги таъкидланди. Бундан ташқари, қарз олувчилар учун тўловни кечиктириш оқибатида юзага келадиган молиявий мажбуриятлар аниқ, шаффоф ва олдиндан тушунарли тарзда белгиланиши зарурлиги қайд этилди.

Марказий банк кредит шартномаларида жавобгарлик чораларини белгилашда адолат ва мутаносиблик тамойилларига қатъий риоя этиш зарурлигини таъкидлади.