Трамп фикридан қайтди

Трамп Гренландия масаласи сабаб Европа давлатларига нисбатан савдо божларини жорий этиш фикридан қайтди.

АҚШ президенти Доналд Трамп Давосдаги Жаҳон иқтисодий форуми доирасида NATO бош котиби Марк Рютте билан учрашувдан сўнг божларни жорий этиш режасидан воз кечди.

Трампнинг сўзларига кўра, улар Гренландия ва бутун Арктика минтақаси бўйича келажакдаги келишувнинг умумий асосларини шакллантиришга муваффақ бўлишган.

"Бу қарор, агар амалга оширилса, Америка Қўшма Штатлари ва NATO'га аъзо барча давлатлар учун катта ижобий натижа бўлади. Шу сабабли 1 февралдан кучга кириши керак бўлган тарифларни жорий этмайман", — деди АҚШ президенти.

Аввалроқ Трамп феврал ойидан бошлаб Дания, Буюк Британия, Норвегия, Швеция, Франция, Германия, Нидерландия ва Финляндиядан АҚШга экспорт қилинадиган барча маҳсулотларга 10 фоизлик бож жорий этиш билан таҳдид қилган эди.