Макрон: "Зеленский ва Путин учрашуви жойи яқин соатларда аниқланади"

Украина ва Россия президентлари Владимир Зеленский ва Владимир Путиннинг икки томонлама учрашуви жойи яқин соатларда аниқланади.

Бу ҳақда Франция етакчиси Эммануэль Макрон журналистларга маълум қилди.

Унга кўра, Европа етакчилари ва АҚШ президенти Дональд Трамп музокаралар давомида ўт очишни тўхтатишни талаб қилмоқда.

"Биринчи учрашувимиздан сўнг Президент Трамп ва Президент Путин ўртасида телефон орқали мулоқот бўлиб ўтди ва аввало Зеленский ва Путин ўртасида яқин соатларда белгиланадиган жойда икки томонлама алоқа ўрнатишга уриниб кўриш, кейин эса Трамп, Зеленский ва Путин иштирокида уч томонлама учрашув ўтказишга қарор қилинди", деди Макрон.

Аввалроқ Россия президенти ёрдамчиси Юрий Ушаков Путин ва Трамп телефон суҳбати чоғида музокараларда иштирок этувчи “Украина ва Россия томонлари вакиллари даражасини ошириш имкониятларини” муҳокама қилганини таъкидлаган эди.