Лукашенко Беларусга 150 минг покистонликни олиб келмоқчи

Беларус 100-150 минг нафар покистонлик мутахассисни ишга қабул қилишга тайёр эканини билдирди. Мамлакат президенти Александр Лукашенко 11 апрель куни Минскда Покистон бош вазири Шаҳбоз Шариф билан ўтказилган музокаралар якунида журналистларга шундай маълумот берди, дея хабар қилмоқда БЕЛТА мухбири.

"Шунингдек, дўстим Покистон бош вазири билан келгуси вақтда турли соҳа мутахассисларини юбориш тўғрисида келишиб олдик. Бу биз сўраган соҳалар бўлади. Покистон раҳбарияти бизга бундай мутахассисларни танлаб беришда кўмаклашади. Бу 100 минг, балки 120-150 минг мутахассис бўлиши мумкин. Биз уларни Беларусда қабул қилишга ва уларнинг ишлаши учун зарур шарт-шароитларни яратиб беришга тайёрмиз," дея таъкидлади у.

Ушбу ташаббус Покистон томонидан катта қизиқиш билан кутиб олинди.

"Саховатли таклифингиз ва Покистондан юз мингдан ортиқ юқори малакали ишчиларни Беларусга ишлаш учун таклиф этганингиз учун бутун қалбимдан, делегациямиз ва Покистон халқи номидан сизга миннатдорчилик билдириш учун ижозат беринг, - деди бош вазир. - Ишонинг, бу таклиф кунимни янада ёрқин қилди. Бу Беларусдан ўзим билан олиб кетаётган ҳақиқий совға, биродарим Александр Лукашенконинг қимматли туҳфаси."

Шаҳбоз Шариф Беларусда ишлаш имкониятига эга бўладиган барча покистонлик "мутахассислар" "аъло даражада тайёргарликка" эга бўлишига ишонч билдирди. "Улар ҳақиқатан ҳам юқори малакали эканликларига ва мамлакатингизга ёрдам бера олишларига амин бўласиз. Улар меҳнатсевар, кўникмаларга эга ва оилаларини таъминлашлари керак. Улар Минск ва Исломобод ўртасида биз қураётган ўша кўприкни барпо этишлари мумкин."