АҚШ-Хитой уруши бошланади: Мутахассислар даҳшатли башорат билан чиқди

АҚШда Хитой билан уруш бўлиши башорат қилинди. Куинси институтининг Шарқий Осиё дастури директори Жейк Верньер АҚШ ва Хитой ўртасидаги иқтисодий рақобат очиқ ҳарбий тўқнашувга айланиб кетиши мумкинлигини таъкидлади. У ўз мулоҳазаларини Американинг Responsible Statecraft нашрида чоп этилган мақоласида баён қилди.

"Жамоатчилик молия бозорларидаги беқарорликни кузатаётган бир пайтда, [АҚШ президенти Доналд] Трампнинг "озодлик куни"дан кейин янада жиддийроқ хавф пайдо бўлди. Бу - кейинги йилларда ҳарбий тус олиши мумкин бўлган Америка-Хитой можаросининг кескинлашуви," - деб таъкидлади мутахассис.

Унинг фикрича, Трамп бошлаган савдо уруши Хитойни бўйсундиришга қаратилган, аммо Пекин бунга тоқат қилишга тайёр эмас. Верньер, агар Хитой иқтисодий босимга бардош бера олса, Америка раҳбари эскалация тарафдорлари устунлик қилган Миллий хавфсизлик кенгаши нуқтаи назарига тобора кўпроқ эътибор қарата бошлашини тахмин қилмоқда.

"Бундай вазиятда Тайван ёки Жанубий Хитой денгизи атрофидаги ҳар қандай хато ҳалокатли оқибатларга олиб келиши мумкин," дея огоҳлантирди таҳлилчи.

Бундан олдин Доналд Трамп Хитой маҳсулотларига божхона тўловларини 145 фоизгача кўтарган эди. У Пекинни Америка маҳсулотларига қўйилган жавоб тарифларини бекор қилишни рад этгани учун "жаҳон бозори қоидаларини писанд қилмасликда" айблаган эди.