Луизиана штатидаги отишмада камида саккиз нафар бола ҳалок бўлди

Луизиана штатининг Шревепорт шаҳрида содир бўлган отишмада камида саккиз нафар вояга етмаган бола ҳалок бўлди ва яна икки киши яраланди.

Бу ҳақда ABC News маҳаллий полицияга таяниб хабар берди.

Хабарларга кўра, қуролли шахс учта турли маҳалладаги бир нечта уйларга қарата ўт очган ва натижада бир ёшдан тахминан 14 ёшгача бўлган саккиз болани ўлдирган, уларнинг баъзилари қуролли шахс билан қариндош бўлган.

Отишмадан сўнг, гумондор машинани ўғирлаб, қочишга уринган. Полиция Боссиер шаҳрида якунланган таъқибни бошлаган, у ерда зобитлар эркакка қарата ўт очишган ва уни ўлдиришган.

Терговда штат детективлари иштирок этмоқда ва ҳуқуқни муҳофаза қилиш органлари ҳодисанинг ҳолатларини аниқлаш устида ишламоқда.