КХДР биткоинларга эгалик қилиш бўйича дунёда учинчи ўринни эгаллади

КХДР биткоинларга эгалик қилиш бўйича дунёда учинчи ўринни эгаллади. Бу ҳақда The Times хабар берди.

Газета маълумотларига кўра, Шимолий Корея энг кўп биткоинга эгалик қилувчилар орасида АҚШ ва Буюк Британия ҳукуматларидан сўнг учинчи ўринни эгаллади. Бунга шимолий кореялик хакерларнинг криптовалюталарни ўғирлаши сабаб бўлган.

КХДРнинг энг йирик киберхакерлик гуруҳи Lazarus умумий ҳисобда 13 580 биткоинга эга бўлиб, унинг қиймати 886 миллион фунт стерлингга тенг. Феврал ойида ушбу хакерлик гуруҳи Bybit криптовалюта биржасига ҳужум қилиб, 1,2 миллиард фунт стерлинг қийматдаги Ethereum криптовалютасини ўғирлаганди. Бу тарихдаги энг йирик ўғирликлардан бири ҳисобланади.

Lazarus гуруҳининг маблағлари Ким Чен Ин учун "қутқарув ҳалқаси" бўлиб, унинг оммавий қирғин қуролларини молиялаштириш манбаси ҳисобланади. БМТ маълумотларига кўра, Шимолий Корея ўзининг ядровий ва баллистик ракета дастурининг 40 фоизгача қисмини "ноқонуний кибер усуллар" орқали молиялаштиради.