Нега Ким Чен Ин ҳеч қачон онаси ҳақида гапирмайди?

Шимолий Корея раҳбари Ким Чен Ин билан боғлиқ кўплаб сирлар орасида унинг онаси ҳақидаги сукут айниқса диққатга сазовордир. Ким Чен Ин ҳокимият тепасига келганига қарийб 15 йил бўлган бўлса-да, шу вақт ичида онасининг исмини бирор марта ҳам омма олдида тилга олмаган.

Шимолий Кореяда ҳукмрон сулоланинг қонунийлиги «Пэкту тоғи авлоди» деган тушунчага асосланади. Афсонага кўра, корейс халқининг тарихи ва давлатчилиги айнан шу муқаддас тоғ билан боғланган. Давлат асосчиси Ким Ир Сен ва унинг ворислари ушбу насабнинг давомчилари сифатида кўрсатилади.

Сулоланинг аввалги авлод аёллари — Ким Ир Сеннинг онаси Кан Пан Сок ва Ким Чен Ирнинг онаси Ким Чен Сук давлат тарғиботида «Корея оналари» сифатида улуғланган. Улар шарафига ҳайкаллар ўрнатилган, муассасалар ва объектлар номланган.

Бироқ Ким Чен Иннинг онаси Ко Ён Хи бундай мақомга эга эмас. Унинг номи давлат оммавий ахборот воситаларида деярли учрамайди ва у ҳақда расмий даражада жуда кам маълумот берилади.

Тадқиқотчиларнинг маълум қилишича, Ко Ён Хи 1952 йилда Япониянинг Осака шаҳрида туғилган. Унинг ота-онаси Жанубий Кореянинг Чежу оролидан чиққан бўлиб, Японияда яшовчи корейс муҳожирлари қатламига мансуб бўлган.

Таҳлилчилар фикрича, унинг келиб чиқиши режим учун ноқулай ҳисобланади. Чунки Шимолий Корея мафкурасида Жанубий Корея душман давлат сифатида талқин қилинади, Япония эса мустамлакачилик ўтмиши сабабли салбий қабул қилинади.

Бундан ташқари, Ко Ён Хи Ким Чен Ирнинг расмий рафиқаси эмас, балки узоқ йиллар давомида унинг яқин ҳамроҳи бўлган. Айрим экспертлар айнан шу ҳолат ҳам унинг давлат тарғиботида четда қолишига сабаб бўлган деб ҳисоблайди.

Шунинг учун Шимолий Корея раҳбарияти Ким Чен Иннинг онаси ҳақидаги маълумотларни оммавий муҳокамадан четда сақлашни маъқул кўради. Бу эса уни мамлакатдаги энг сирли шахслардан бирига айлантирган.