«Коммерсант»: Россия АҚШ билан Запорожье АЭС устидан қўшма назорат масаласини муҳокама қиляпти

Россия ва АҚШ Украина иштирокисиз, Россия қўшинлари томонидан эгаллаб олинган Запорожье атом электр станциясини қўшма бошқариш масаласини муҳокама қилмоқда. Бу ҳақда манбасини ошкор этмаган ҳолда «Коммерсант» нашри хабар берди.

Нашрнинг маълум қилишича, Путин бу ҳақда 24 декабрь куни бизнес вакиллари билан бўлиб ўтган ёпиқ учрашувда гапирган. Нашр мухбири Андрей Колесниковнинг сўзларига кўра, Путин «америкалик ҳамкорлар, масалан, Запорожье АЭСда майнинг билан шуғулланишга қизиқиш билдиришган. Шунингдек, Украинага электр энергияси етказиб бериш масаласи ҳам АҚШ ташаббуси билан муҳокама қилинган»ини айтган.

Колесниковнинг қўшимча қилишича, Путин АҚШ томони Россиядан Украина мутахассислари АЭСда ишлаши мумкинми ёки йўқлиги билан қизиққанини билдирган. Путин эса бунга «улар ҳозир ҳам у ерда ишлаяпти, аввалгидек, фақат энди уларнинг паспортлари Россияники», деб жавоб берган.

Россия Запорожье АЭСни (Европадаги энг йирик атом электр станцияси) Украинага қарши кенг кўламли босқиннинг илк кунларидаёқ эгаллаб олган эди. Станция устидан назорат масаласи Россия ва Украина ўртасидаги можарони ҳал этиш бўйича музокараларда кўтарилаётган асосий мавзулардан бири ҳисобланади.

Украина президенти Владимир Зеленский аввалроқ АҚШ томони АЭСни Украина, Россия ва АҚШ қўшма тарзда эксплуатация қилишни таклиф этаётганини маълум қилган эди. Бу ҳолатда АҚШ қўшма корхонанинг асосий менежери бўлиши керак.

Зеленскийнинг айтишича, Украина станцияни фақат Киев ва Вашингтон биргаликда бошқариш тарафдори. Бундай моделда ишлаб чиқарилган электр энергиясининг 50 фоизи Украинага, қолган 50 фоизи эса АҚШга тақсимланиши мумкин.