Колумбия президентига қарши суиқасд уюштирилиши режалаштирилгани маълум бўлди

Колумбия президенти Густаво Петро ўзи бораётган вертолёт суиқасд таҳдиди туфайли йўналишни ўзгартиришга мажбур бўлганини эълон қилди.

Петро бу ҳақда президент маъмуриятининг YouTube-каналида эфирга узатилган ҳукумат йиғилишида маълум қилди.

Петро вертолётга ўқ узилишидан хавотирланиб, режалаштирилган манзилига қўна олмаганини айтди. Унинг қўшимча қилишича, бортда унинг фарзандлари ҳам бўлган.

"Мен қўнишим керак бўлган жойга қўнмадим, чунки вертолётга ўқ узилишидан хавотирлар бор эди", деди давлат раҳбари.

Петро ўлимдан қутулганини таъкидлади. "Биз очиқ денгиз устида тўрт соат учдик ва кутилмаган манзилга етиб келдик", дея қўшимча қилди у.