Клублар ўртасидаги жаҳон чемпионатининг энг яхши футболчиси аниқланди (фото)

"Челси" ярим ҳимоячиси Коул Палмер 2025 йилги клублар ўртасидаги жаҳон чемпионатининг энг яхши футболчиси деб топилди.

Бу ҳақда ФИФА расмий сайти хабар берди.

Маълумотларга кўра, 23 ёшли англиялик футболчи турнирнинг еттита ўйинидан олтитасида иштирок этиб, учта гол урган ва битта голли узатмани амалга оширган. Палмер улардан иккитасини турнир финалида киритди. Умуман олганда, футболчи ўтган мавсумда 53 та ўйинда иштирок этиб, 20 та гол урган ва 14 та голли узатмани амалга оширган.

Палмер, шунингдек, лондонликлар Франциянинг "ПСЖ" клубини мағлуб этган (3:0) финал ўйинининг энг яхши футболчиси деб топилди.

"Челси" бу кўрсаткич бўйича дунёда учинчи ўринни эгаллаб, тарихда иккинчи марта клублар ўртасидаги жаҳон чемпионатида ғолиб чиқди. Турнирда фақат “Барселона” (3) ва “Реал Мадрид” (5) клублари кўпроқ ғалаба қозонишган. “Кўклар” биринчи марта 2021 йилда кубокни қўлга киритишганди.