Кейн Чемпионлар лигасида Мессининг натижасидан ўзиб кетди

Мюнхеннинг «Бавария» клуби ҳужумчиси Ҳарри Кейн УЕФА Чемпионлар лигаси умумий босқичида «Викинг»га қарши учрашувда дубль қайд этди.

33 ёшли футболчи Норвегиядаги баҳсда мюнхенликларнинг ҳисобни тенглаштиришга қаратилган ҳаракатларини бошлаб берди. У 54-дақиқада пенальтини аниқ амалга оширди, 60-дақиқада эса иккинчи голини уриб, ҳисобни 2:2 кўринишига келтирди.

talkSPORT маълумотига кўра, Кейн 30 ёшга тўлганидан кейин Чемпионлар лигасида ўтказган 40 та учрашувида 36 та гол уришга муваффақ бўлди.

Шу тариқа, англиялик ҳужумчи мазкур кўрсаткич бўйича Лионель Мессидан ўзиб кетди. Аргентиналик футболчи 30 ёшга тўлганидан кейин мусобақада 48 та ўйин ўтказиб, 35 марта рақиблар дарвозасини ишғол қилган.

Эслатиб ўтамиз, Месси 2023 йилда Европани тарк этиб, АҚШнинг «Интер Майами» клубига ўтган эди.

Ҳарри Кейн ҳам 2023 йилдан буён «Бавария» шарафини ҳимоя қилиб келмоқда. У бунга қадар «Тоттенхэм» клубида тўп сурган.