“Катта еттилик” давлатлари Россияга таҳдид қилди

“Катта еттилик” давлатлари Россия Украинада ўт очишни тўхтатмаса, унга нисбатан санкцияларни кучайтириш билан таҳдид қилди, деб хабар бермоқда Тhe New York Times

G7 давлатлари Украинани қўллаб-қувватлашни давом эттиришга келишиб олди ва Россияни ўт очишни тўхтатмаслиги ҳолатида қўшимча санкциялар билан огоҳлантирди. 22 май куни эълон қилинган баёнотда айтилишича, агар Россия ўт очишни тўхтатмаса, G7 давлатлари барча мумкин бўлган вариантларни, жумладан, санкцияларни янада кучайтиришни кўриб чиқишда давом этади", дея хабар бермоқда газета.

NYT'нинг ёзишича, “Катта еттилик” вакиллари Москвага қарши чора сифатида Россия нефтининг экспорт нархига қўйилган чегарани янада қатъийлаштириш масаласини ҳам муҳокама қилган.

"G7 давлатлари Украинанинг ҳудудий яхлитлигини, мавжудлик ҳуқуқини, шунингдек эркинлиги, суверенитети ва мустақиллигини адолатли ва барқарор тинчлик сари йўлда қўллаб-қувватлашга содиқ қолади", дейилади баёнотда.