Женевада ядровий музокаралар давом этмоқда

Женевада Буюк Британия, Франция, Германия ва Эрон ўртасида ядровий масала бўйича ёпиқ эшиклар ортидаги музокаралар бўлиб ўтмоқда.

Бу ҳақда Эрон ташқи ишлар вазири ўринбосари Казем Ғариб-Ободий маълум қилди.

Бу музокаралар матбуот учун ёпиқ тарзда ўтади. Тадбирларнинг аниқ жойлашуви ва иштирокчилар даражаси ҳақида ҳам хабар берилмаган.

Аввалроқ Ғариб-Ободий Эрон ва Европа ўртасида ядровий келишув бўйича маслаҳатлашувларнинг янги раунди 13 январь куни бўлиб ўтишини маълум қилган эди.

Эрон ва ЕИ-3 ўртасидаги сўнгги ядровий музокаралар икки йиллик танаффусдан сўнг 2024 йилнинг 29 ноябрида Женевада бўлиб ўтди. Музокараларда Эрон делегациясига Эрон ташқи ишлар вазирининг сиёсий масалалар бўйича ёрдамчиси Мажид Тахт-Равончи бошчилик қилди.